Ymddiriedolwr Ymddiriedolaeth Elusennol Arfordir Penfro

Elusen annibynnol yw’r Ymddiriedolaeth sy'n codi arian i helpu i ddiogelu a gwella rhinweddau arbennig Parc Cenedlaethol Arfordir Penfro. O warchod rhywogaethau a chynefinoedd prin i gefnogi dysgu yn yr awyr agored, materion mynediad, a phrosiectau treftadaeth, rydym yn gweithio i sicrhau y gofelir am y dirwedd unigryw hon i’w mwynhau heddiw ac i genedlaethau'r dyfodol.

Gwahoddir ceisiadau am rôl Ymddiriedolwr i helpu i lywio’r modd y mae’r elusen yn datblygu, a chefnogi rhaglen uchelgeisiol ac effeithiol o godi arian ar gyfer gwarchod byd natur, treftadaeth a lles cymunedol ym mhob rhan o Barc Cenedlaethol Arfordir Penfro a'r ardal gyfagos.

Bydd ymddiriedolwyr yn chwarae rhan allweddol o ran llywio cyfeiriad strategol yr elusen, gan ddatblygu a mabwysiadu polisïau priodol, a helpu i sicrhau bod yr Ymddiriedolaeth yn diwallu ei rhwymedigaethau cyfreithiol ac yn cyflawni arfer gorau ym mhob peth a wna.

Drwy gefnogi Cyfarwyddwr yr Elusen a'r Swyddog Ariannu, byddwch yn rhoi cyfarwyddyd, mewnwelediad ac arweiniad i helpu'r Ymddiriedolaeth gynyddu ei chyrhaeddiad a'i heffaith.
Rydym yn arbennig o awyddus i glywed gan ymgeiswyr sydd â phrofiad mewn codi arian, materion dyngarol, neu gynhyrchu incwm, all ein helpu i adeiladu cymorth hirdymor i'n gwaith. P'un a ydych yn dod â gwybodaeth am ffyrdd o godi arian i ymddiriedolaeth a sefydliadau, cynyddu nifer y rhoddwyr ar raddfa fawr, partneriaethau corfforaethol, neu ymgyrchoedd ymgysylltu â'r cyhoedd, gallai eich mewnbwn wneud gwahaniaeth gwirioneddol.

Dylech fod yn angerddol am fyd natur a diddordeb yng ngwaith Parc Cenedlaethol Arfordir Penfro. Efallai y byddwch yn dod â phrofiad o weithio ar fwrdd, pwyllgor, neu o fewn grwp gwneud penderfyniadau mewn corff gwirfoddol neu fusnes. Byddai gwybodaeth am ofynion cyfreithiol elusennau a/neu wybodaeth leol am Sir Benfro yn werthfawr.

A fyddech gystal â chael golwg ar y pecyn recriwtio ymddiriedolwr am fanylion llawn y cyfrifoldebau a’r fanyleb person.
Swydd wirfoddol yw hon nad yw'n derbyn tâl. Bydd treuliau teithio a chynhaliaeth rhesymol yn cael eu had-dalu. Ni fyddwch yn cael eich cyflogi gan Ymddiriedolaeth Parc Cenedlaethol Arfordir Penfro.

Am drafodaeth anffurfiol am y rôl, cysyllter â katiem@pembrokeshirecoast.org.uk

Rydym wedi ymrwymo i gyfle cyfartal ac yn croesawu ceisiadau gan unigolion waeth beth fo'u hoedran, anabledd, rhyw, ailbennu rhywedd, cyfeiriadedd rhywiol, beichiogrwydd a mamolaeth, hil, crefydd neu gred, a statws priodasol neu bartneriaeth sifil.
Rydym yn addo gwella amrywiaeth ein Bwrdd ac felly'n gwarantu cyfweliad i ymgeiswyr anabl sy'n bodloni'r meini prawf hanfodol ac yn gwneud cais drwy ein Cynllun Cyflogwyr Hyderus o ran Anabledd.

Bydd ceisiadau yn cael eu hadolygu wrth iddynt ddod i law, a bydd cyfweliadau yn cael eu trefnu pan fydd ymgeiswyr addas yn gwneud cais. Anogir gwneud cais yn gynnar.

Mae Ymddiriedolaeth Parc Cenedlaethol Arfordir Penfro yn neilltuo’r hawl i gau'r swydd wag hon yn gynnar.